«Жасыл шырақ» жарысы

Жол ҳәрекети қәўипсизлиги инсан өмири ҳәм денсаўлығын сақлаўдың баслы машқалаларының бири. Автомобиль транспорты ағымының тезлик пенен өсип киятырған дәўирде ҳәр бир адам бул қурамалы техника менен танысады ҳәм жол ҳәрекетиниң қатнасыўшысына айланады. Демек, қәўипсизлик қағыйдалары ҳәм  талапларына саналы рәўиште әмел етиўге үйретиў, мектеп жасынан баслап итибар бериў зәрүрлиги келип шығады. Усы жыл 28-апрель күни Нөкис қаласы 2-санлы улыўма билим бериў мектебинде усындай ис-иләжлардың бири болып өтти. Министрликтиң буйрығы менен улыўма орта билим бериў мектеп оқыўшылары арасында «Жасыл шырақ» жарысының Республикалық басқышы өткерилди. Жарыс бир неше шәртлерден ибарат болып, онда улыўма 13 команда қатнасты. Ҳәр бир команда өзлериниң қоллап-қуўатлаўшылары, мектеп оқытыўшылары, класс басшылары, «Камолот» ЖЖҲ мектептеги ўәкиллери ҳәм ата-аналары менен келди. Төрешилер қурамы ҚР ХБМ РОМО методисти Р.Ержанов, ҚР ИИМ ЖҲҚ басқармасының инспекторлары Қ.Муратов ҳәм Ә.Қудайназаров, мектеп оқытыўшылары А.Султанов ҳәм Б.Джиемуратовлардан ибарат болып, ҳәр бир шәртти әдил баҳалады. Жарыс даўамында, Шымбай районы 14- ҳәм 19-санлы балалар бақшаларының мийирбийкелери  Г.Жуманова ҳәм Г.Айтмуратовалар ҳәр бир қатнасыўшының кейпияты, ден-саўлығынан хабардар болып турды.

Жарыс жуўмағында ҚР ХБМ диплом ҳәм ҳүрмет жарлықлары менен қатнасыўшылар сыйлықланды. Нөкис қаласы 43-санлы улыўма орта билим мектеби 1-орынды ийелеп кейинги Өзбекистан Республикасы басқышына жоллама алды, «Прогресс» БҳәмРО қәнигелестирилген  мәмлекетлик улыўма билим бериў мектеби оқыўшылары 2-орынды, 3-орын Қанлыкөл ҳәм Кегейли районларының мектеплери командаларына дипломлар мүнәсип етти.  Сондай-ақ, алыс аймақта жайласыўына қарамастан, Мойнақ районынан келип қатнасқан 1-санлы қәнигелестирилген мектеби айрықша белсендилик пенен жарыста қатнасқаны ушын «Ҳүрмет жарлығы» менен сыйлықланды. Соныда қуўаныш пенен айтып өтиўимиз керек «Жасыл шырақ» жарысының Өзбекистан Республикасы быйыл Бухара ўәлаятында өткерилип, ол жарыста Нөкис қаласы 43-санлы мектеп командасы қатнасып 1-орынды алыўға миясар болды ҳәм бул ерисилген нәтийжеге ерисиўине себепши болған команда ағзаларына, команданы таярлаған устаз оқытыўшыларға, мектеп ҳәкимшилигине Министрлик ҳәм өзимниң атымнан миннетдаршылық билдиремен.  

Бул мәмлекетимизде, оқыўшылар өз  өмирине, денсаўлығына болған саламат мүнәсийбет ҳәм жеке қәўипсизлигин тәмийинлеўде жуўапкерлик сезимин тәрбиялаў ҳәм қәлиплестириў мақсетинде исленип атырған қайырлы ислердиң бири. 

Р.Ержанов-Республикалық оқыў методикалық орайы методисти 

Sana: 2017-06-30 /// O'qildi: 136
Orqaga qaytish