Prezident Shavkat Mirziyoev ilimpazlar, ilimiy izertlew mákemeleriniń basshıları hám óndirislik sektor wákilleri menen ushırasıw ótkerdi.

Prezident ilimpazlar menen ushırasıwında matematika iliminiń áhmiyeti haqqında aytıp, jaslardı usı ilimge qızıqtırıwdı kúsheytiw boyınsha wazıypalardı belgilep berdi.

– Matematika barlıq anıq ilimlerdiń tiykarı. Bul pándi jaqsı bilgen bala aqıllı, oylaw sheńberi keń bolıp ósedi, qálegen tarawda nátiyjeli jumıs islep ketedi, – dedi mámleketimiz basshısı.

Hár bir rayon orayında birewden matematika pánine qánigelesken mektep shólkemlestirilip, olarda isleytuǵın muǵallimlerge qosımsha ústeme haqılar tólew boyınsha kórsetpe berildi. Usı mákemelerde oqıw procesin ilimiy-metodikalıq jaqtan támiyinlew ushın Ilimler akademiyasınıń Matematika institutı jáne Xalıq bilimlendiriw ministrligi juwapker etip belgilendi.

Matematika páni boyınsha oqıwshı, student hám muǵallimler arasında hár qıylı tańlawlar ótkerip, jeńimpazlardı múnásip xoshametlew, olimpiada sistemasın jetilistirgen halda sıylı orın iyelerine beriletuǵın sıylıqlardı kóbeytiw áhmiyetli ekenligi atap ótildi.