Ózbekstan Respublikası Ministrler Kabinetiniń biyligine muwapıq, usı jıldıń 14-15-mart kúnleri elimiz boylap «Abat jurt» ulıwma xalıqlıq abadanlastırıw hám kóklemzarlastırıw qayırqomlıq shembiligi ótkeriledi.
Barlıq wálayat, rayon hám qala hákimlikleri ulıwma xalıqlıq shembiligi ótkeriletuǵın kúnleri óz aymaqlarında terek hám gúl nállerin egip, baǵ hám gúlzarlar jaratıw, máhálleler, bilimlendiriw mákemeleri, xalıq jasaw orınları, kóp etajlı imaratlar hám qoyımshılıqlardı jáne balalar maydanshaların tártipke keltiriw jumıslarına basshılıq etedi.
Shembilik kúnleri sociallıq járdemge mútáj kekseler, pensionerler hám mayıplıǵı bolǵan adamlar, jalǵız jasaytuǵın qarıyalar, kem támiyinlengen, baǵıwshısınan ayrılǵan shańaraqlardıń turaq jay sharayatların jaqsılawǵa kómeklesiledi.
Ulıwma xalıqlıq shembilik sheńberinde bolmaǵan basqa túrdegi jámiyetlik jumıslar, atap aytqanda, qurılıs-ońlaw hám awıl xojalıǵı jumıslarına májbúriy tartıwǵa qatań túrde jol qoyılmawı da hújjette ayrıqsha atap ótilgen. Sonday-aq, avtomobiller kóp qatnaytuǵın jollar, suw obektleri, suw jaǵaları bolǵan aymaqlar hám zonalar, qurılıs maydanları, imaratlar hám obektlerdiń tóbesi, qáwipli óndirislik obektler, sonday-aq, adam ómiri hám densawlıǵına qáwip tuwdırıwı múmkin bolǵan basqa orınlarda ıqtıyarlı baslama menen shembilik ótkeriw qadaǵan etiledi.
Sonday-aq, ulıwma xalıqlıq qayırqomlıq shembiligi sheńberinde 14-mart kúni respublikalıq kólemde jaslar qatnasıwında ekologiyalıq akciyalar shólkemlestiriw názerde tutılǵan.