Búgin, 12-avgust kúni Ózbekstan Respublikası Xalıq bilimlendiriw tarawı xızmetkerleriniń dástúriy Avgust keńesi (ZOOM badarlaması arqalı onlayn) óz jumısın basladı.
Ilajda Qaraqalpaqstan Respublikası Xalıq bilimlendiriw ministri, Tashkent qalası hám barlıq wálayatlardıń Xalıq bilimlendiriw bólimleriniń baslıqları sonday-aq, Qaraqalpaqstan Respublikası Xalıq bilimlendiriw ministrliginiń orınbasarları, Respublikalıq oqıw-metodikalıq Orayı basshıları, ministrliktiń bólim baslıqları hám metodist xızmetkerleri qatnastı.
Ilajda Ózbekstan Respublikası Xalıq Bilimlendiriw ministriniń birinshi orınbasarı U.Sharifxodjaev qatnastı hám alıp bardı. Taraw basshısı elimizde bilimlendiriw mákemelerin qurıw, rekonstrukciyalaw, iri ońlaw, zamanagóy oqıw-laboratoriya úskeneleri, kompyuter texnikası hám oqıw-metodikalıq qollanbalar menen támiyinlew boyınsha jumıslardı ámelge asırıw arqalı olardıń materiallıq-texnikalıq bazasın bekkemlew, ulıwma orta bilim beriwdiń sapasın jaqsılaw baǵdarında ámelge asırılıp atırǵan jumıslarǵa toqtap ótti.

Sonday-aq, bilim beriw hám oqıtıwdıń sapasın bahalawdıń xalıqaralıq standartların engiziw boyınsha alda turǵan wazıypalar da atap ótildi.
Avgust keńesinde 8 cekciya boyınsha jumıs alıp barılıp, taraw xızmetkerleriniń aldına kóplegen wazıypalar qoyıldı.
Dástúriy ilajda xalıq bilimlendiriw tarawı xızmetkerleriniń juwapkershiligin hám belsendiligin arttırıw, 2019-2020-oqıw jılı juwmaqları hámde jańa 2020-2021-oqıw jılında ótkeriletuǵın pán olimpiadaları, bilimler bellesiwleri tuwralı usınıslar berilip, muǵallimlerdiń kásiplik sheberligin arttırıw, aldıńǵı tájiriybelerdi en jaydırıw arqalı jańa oqıw jılında tálim-tárbiya sapasın ele de arttırıw boyınsha baslı wazıypalardı belgilep alıw tiykarǵı maqset etip qoyıldı,-deydi Qaraqalpaqstan Respublikası XBM Respublikalıq oqıw-metodikalıq orayınıń direktorı orınbasarı A.Dauletbaev.

Dástúriy avgust keńesi qatnasıwshılar menen óz-ara sáwbetlesiwler shólkemlestirildi hám olardıń usınısları tıńlanıp, búgingi kún talabınan kelip shıǵıp tiyisli wazıypalar belgilendi.