2020-jıldıń 1-fevral kúnine shekem Xalıq bilimlendiriw ministrligi sistemasındaǵı barlıq ulıwma bilim beriw mekteplerinde “Jas oqıtıwshılar klubı” xızmeti jolǵa qoyıladı.

“Jas oqıtıwshılar klubı” oqıwshılardıń sabaqtan bos waqtın nátiyjeli shólkemlestiriw, pedagogika tarawına qızıqqan oqıwshı-jaslardı maqsetli tárbiyalaw, olardı selekciyalaw, oqıtıwshılıq kásibin qádirlew hámde hár tárepleme barkámal áwladtı tárbiyalawǵa kómeklesiwge xızmet etedi.

Klubqa 8-11-klassta okıp atırǵan keleshekte oqıtıwshılıq kásibin iyelemekshi bolǵan (ózin jas oqıtıwshı sıpatında sınap kóriw niyetindegi) oqıwshılar aǵza bolıwı múmkin.

Klub aǵzası ózin jas oqıtıwshı sıpatında sınap kóriw ushın bir pándi tańlaydı hám ulıwma orta bilim beriw mektebiniń sol pán oqıtıwshısına “Ustaz-shákirt” dástúrine muwapıq biriktiriledi. Ózi tańlaǵan páni boyınsha biriktirilgen oqıtıwshı menen shuǵıllanadı. Sonıń menen birge klub aǵzasına háptede eki kún (arnawlı keste tiykarında) sabaqtan soń ulıwma orta bilim beriw mektebiniń ajıratılǵan klass xanasında ózi tańlaǵan páni boyınsha jas oqıtıwshı sıpatında óziniń bilgenlerin teńleslerine úyretken halda shınıǵıwlar alıp barıw imkaniyatı beriledi. Keleshekte okıtıwshılıq kásibin iyelemekshi bolǵan oqıwshılar “Jas oqıtıwshılar klubı” – bul Siziń maqsetińizge qaray jeteklewshi jańa imkaniyat esigi.