Qaraqalpaqstan Respublikası Ayrıqsha jaǵdaylar basqarması tárepinen paytaxtımızda jaylasqan 46-sanlı mektepte (progress rawajlanıw orayı) Prezidentimiz tarepinen belgilep berilgen “5 baslama – 5 imkaniyat” baslama sheńberinde ilaj shólkemlestirildi.

Onda basqarma tárepinen tańlaw ótkerilip, mektep oqıwshılarınan quralǵan 5 komanda óz-ara ayrıqsha jaǵdaylar hám órt qáwpine baylanıslı bolǵan soraw-juwap, rebus, krossvord sheshiw, órt-kutqarıwshılar kiyimin kiyiw, estafeta jarısları menen bellesti.

Sonday-aq, Qaraqalpaqstan Respublikası Ayrıqsha jaǵdaylar basqarması baslıǵı Azamat Dawletov oqıwshı jaslarǵa Ayrıqsha jaǵdaylar ministrligi tárepinen Moynaq rayonı Aral teniziniń ultanında alıp barılıp atırǵan keń kólemli kóklemzarlastırıw jumısları hám bul islerde jaslarımızdıń belsendiligin video rolik arqalı kórsetip aytıp berdi.

Ilaj dawamında órt-qutqarıw texnikaları kórgizbesi de ótkerildi.

Ilajdan kózlengen jáne bir maqset jaslarımızdıń órt-qutqarıwshı degen kásipke qızıǵıushılıqtı oyatıw bolıp esaplanadı.

Ótkerilgen ilaj dawamında belsendi qatnasqan oqıwshılarǵa hám olardı tayarlaǵan ustazlarına basqarma tárepinen sawǵalar tapsırıldı. (zaman.uz)