Inglis tili hám grammatikasın úyreniw hám sóz baylıǵın arttırıwdıń jaqsı jolı – shıǵarmalardı inglis tilinde oqıw bolıp tabıladı. Bul usıl avtordı, onıń stili hám tilin túsiniwge járdem beredi. Álbette, ózińizge unaǵan shıǵarmanı inglis tilinde oqıw ańsat emes, biraq zawıqlı. «Alisa ájayıbatlar elinde» shıǵarmasınıń awdarmasın qansha oqıǵan menen, avtordı báribir tolıq túsinbeymiz. Sonıń ushın da, inglis tilin úyreniwshilerge kitap oqıw ushın biypul saytlar dizimin usınamız.

«Free–ebooks.net» – bul qolaylı kitapxanada elektron kitaplar kompleksi janrlar boyınsha bólingen. Kitaplardan tısqarı jurnallar da bar. Biypul paydalanıw ushın registraciyadan ótiw kerek.

«FreeBookSpot.es» – 5000 nan aslam elektron kitaplar toplamınan ibarat onlayn-resurs esaplanadı. Bulardıń barlıǵı biypul bolıp, kitaplar 95 kategoriyaǵa bólingen. Ádebiy kitaplardan basqa bizneske baylanıslı kitaplardı da tabasız. Olardı kóshirip alıw biypul. Registraciyadan ótiw de shárt emes.

«ManyBooks.net» – 33000 nan aslam elektron kitaplardı óz ishine jámlegen sayt. Kitaplar álipbe tártibinde jaylastırılǵan. Kitaplar kompyuter, «Kindle», «Nook», «iPad»larda oqıw ushın formatlanǵan. Ayrım kitaplar 20 túrli formata da usınılǵanlıǵı menen ajıralıp turadı.

«GetFreeEBooks.com» – bul avtorlardıń óz shıǵarmaların oqıwshılarǵa usınatuǵın ortalıǵı esaplanadı. Millionnan aslam kitaplar bar hám olar jıl sayın kóbeyip barmaqta. Kópshilik kitaplar EPUB, MOBI, PDF, TXT formatlarında usınılǵan.

«FreeComputerBooks.com» – kompyuter baǵdarlamaları hám matematika boyınsha kitaplardıń kompleksi esaplanadı. Olardıń arasınan sabaqlıqlar menen oqıwlıq qollanbalardı da tabıw múmkin.

«FreeTechBooks.com» – informatika, injeneriya hám kompyuter baǵdarlamaları haqqındaǵı biypul kitaplar saytı.

«The Online Books Page» (http://onlinebooks.library.upenn.edu/) – Internettegi 30 mıńnan aslam biypul kitaplar saytı.

«Baen Free Library» (https://www.baen.com/) – ilimiy-fantastikalıq romanlar kompleksi. Onlayn oqıw yamasa kóshirip alıwǵa da boladı.

«eBookLobby.com» – bul sayttaǵı biypul elektron kitaplar hár qıylı janrlarǵa bólingen: biznes, kórkem óner, bilimlendiriw… Kerekli kategoriyanı tańlap, qálegen kitabıńızdı kóshirip alsańız boladı.

«Project Gutenberg» (http://www.gutenberg.org/) – 75 mıńnan aslam elektron kitaplar jaylasqan. Izlegen kitabıńızdı qálegen formatta kóshirip alıwıńızǵa boladı.

«PlaneteBook.com» – ádebiy shıǵarmalar kitapxanası. Kitaplardı kóshirip alıp oqıwǵa boladı.

«e-Library.net» – kitapxanada 91 kategoriya boyınsha 8 mıńnan aslam kitap jaylasqan. Bulardıń 500 den aslamı biypul oqıwǵa bolatuǵın kitaplar bolıp tabıladı.

«BookBoon.com» – studentler hám sayaxat etiwdi xosh kóriwshiler ushın PDF formatındaǵı kitaplar saytı. Registraciyadan ótiwińiz shárt emes.

«ClassicShorts.com» – jazıwshılardıń kórkem-ádebiy shıǵarmaların usı sayttan tabıwıńız múmkin. Barlıq shıǵarmalardı onlayn tárizde biypul oqıw imkaniyatı bar. (kknews.uz)